Flutura Açka, Gjakmarrje apo biznes gjaku (Gazeta Shqiptae 31/1/2009)
Flutura Açka, Harrim e ke emrin grua (Shqip, 8 mars 2008)
Flutura Açka, Shovinizmi femëror
Flutura Açka, Edvard Munch - "Klithma"
e fikur në muzg Botuar në gazetën "Shekulli" (gusht
2004)
Flutura Açka, Atdhe 1 tradhtuar
(Shqip, 27.01.2011)
Flutura Açka, 'Qyqe shqiptare, bashohuni' (Shqip, 8 Mars 2011)
Shqiptarët
Flutura Açka
Pak dritë!
Veriu i Evropës. E shtyrë nga një ndjesi e çuditshme që
prej ditësh më sillet ndër mend, një mbrëmje të
vonë u enda nëpër rrugët e periferisë së ftohtë,
si për t'i dhënë një kuptim asaj që quhet atmosferë
festash. Këtu, i ftohti dhe era është parafjala e çdo
dite dimri. Si shqiptare, njeri që s'rron dot pa mërzi, ndjej diçka
që më bën të ndjehem keq: llamburia e dritave. Një
lajthitje, sigurisht, do të ishte thënë shkurt për një
gjendje si kjo, të lajthitesh nga pushtimi i dritës. Kishte diçka
përtej mistikes pamja përpara: thurima të tëra shtëpish
mbushur me llambëza të vogla, që trembnin çdo skutë
të natës, ferrishte që me një krenari të lustërt,
hepoheshin nga era bashkë më rrezëllimin e flurtë të
llambushkave me të cilat ishin ngarkuar, pemë me gjethnajë të
grisur nga dimri por me pamje degësh si gishtërinj të përkorë
prej atij ndriçimi eshtëror që u përcillte vargani i perltë
i dritave, shkurreta të qendisura me shkëlqim të fildishtë.
Mjaft të mbyll pak sytë dhe kthehem sërish tek errësira,
e cila më ka gjurmuar gjatë, si ardhëse nga një vend me
dritë të pakët artificiale, por dritë të tepërt
diellore. Zoti duket e ka të vështirë t'ua japë të
plotë ndonjëherë bollëkun shqiptarëve, atë që
ta bën jetën më shumë se të bukur dhe, për një
arsye të thjeshtë dhe sublime ti do të kesh NJË problem,
dhe vetëm NJË: nuk do të kesh më probleme për të
zgjidhur.
Kjo lloj loje me dritën është një filozofi pa ndonjë
lloj kuptimi specifik për njerëz si unë të mësuar me
teprinë e errësirës dhe mangësinë e dritës. Mjafton
të shkëputesh disa ditë nga Shqipëria për të kuptuar
ç'ke lënë pas, mbi gjithçka, terrin. Kjo të bëhet
më e dukshme në prag feste, dhe sidomos, të guxosh ta prekësh
këtë ndjesi kaq pranë, bri shtëpish të "mbytura"
nga dritat. Tejepërtej qelqesh shoh gjithçka që e kalon magjinë,
një "turr" njerëzor për të zbukuruar çdo
detaj, që do t'u duhet ta risjellin në pamjen e mëparshme disa
ditë më pas, si një gjë e papërtueshme, si një
vetëlumturi. Tej qelqeve, lukunia e dritave më grish të shkoj
përtej vështrimit tim të thjeshtë: Një bredh i vogël,
fare i vogël në kënd të një skrivanie të rrëmujshme
nga letra postale ende të pahapura, një bredh tjetër më
i madh vendosur në kënd të dhomës së ndenjes, ku ndonjë
kokë e shogël plaku a ndonjë gruaje që diç po sajon
mes metalinave të kuzhinës, duken si të veshur me shkëlqim,
duken, me një fjalë, më të bukur se ç'janë.
Pa dalë ende nga ky sfond, nga dera që hapet lehtë vërshon
një ujvarë drite nga gjithfarë zilkash që shkunden lehtë
si për të të kujtuar që pas saj, i fshehur Shën Pjetri
do të të presë udhën për të të dhënë
ose jo të drejtën të hysh në këtë ëndërr
parajsore. Pastaj si për të vazhduar lojën me dritën, unë
ngre kryet në katin e sipërm ku yje të ndezur duket sikur përpiqen
të plagosin hijen e xhamtë të pemëve mbi sipërfaqen
e fasadës së ndërtesës. Dhe me mend s'kam si të mos
e ndërtoj deri në fund këtë mbretëri drite, duke u
ngjitur lart nëpër shkallëzën e drunjtë, ku janë
qepur gjithfarë topthash e ledhkash që bëjnë dritë
(sigurisht), madje ngjitem edhe në papafingo ku rrëmuja e hedhurinave
të shtëpisë ndjehet e papërfillur po të mos ndriçohet
me dritë (sigurisht), qoftë edhe me një qiri të rrethuar
paq me një mbrojtëse të kristaltë, prej ngjyrave të
të cilës drita vjen si e laryshisur. Pastaj rrugëtimi nëpër
Kumtër ngjitet lart, ku një pullaz, megjithëse i ndriçuar
nga jashtë paq nga festa e pemëve të kopshtit, nuk harron të
nxjerrë shkëndijëzat e ndonjë zjarri të ndezur kushedi
se ku në ç'anë të zemrës së shtëpisë.
Do të kisha dashur ta merrje atë dritë të tepërt ferrishtesh
për të ndriçuar së paku natën e një familjeje
që fle pa dritë diku në vendin tim, mbase shpirtin e atyre fënijëve
që u dogjën pak ditë më parë në rrethinat e Elbasanit.
Do të kisha dashur ta merrje atë nxitim xixash të pullazit të
ngrohja natën e një të vetmuari atje. Por s'kam asnjë forcë
ta bëj këtë, madje, s'kam as forcë ta mendoj këtë,
se dhe me kaq mbretëria e dhimbjes që më shfaqet në një
ekran bardhëzi, ma mbyt mbretërinë e sajuar të dritës
para syve. Mbyll një çast sytë për ta prekur errësirën
me të cilën shpesh kam bërë paqe, bashkë me shumë
të tjerë, me nervin e mpirë të revoltës. Më vijnë
në mend gjëra që s'i kam bërë dhe gjëra që
s'do t'i bëj kurrë. Më vijnë në mendje vargjet e poetit
V. S. që thotë: më mirë qen në Bernë/se njeri
në Shqipëri. Sigurisht kur i ka shkruar këto vargje, sytë
i ka mbyllur vetëm për ta ndjerë errësirën që
ta kishte më të lehtë rrugën e kthimit nga Largu, bashkë
me errësirën e arkës së drunjtë lëvizëse
ku do ta ndrynin të tijtë kur të ikte nga kjo botë. Dikur
ai m'i pat recituar këto vargje i përlotur pranë një bankine
të lulëruar zvicerane, duke mërmëritur: më duket se
do të vdes këtej, sikur kjo këtej të ishte një gjë
pa kahje. Ia lexoj vetes vargjet sipas variantit të krijuar befas para
kësaj feste dritash: Më mirë ferrë në Hollandë/se
manjolë në Shqipëri.